I-klik para mabatian ang malip-ut nga pagbasa ni Pangga Gen:
Ekserpt kang Binalaybay:
Sa Gihapon, Palangga, ang Uran
ni Genevieve L. Asenjo
I.
May kudal sa atun tunga kag ang kasanag kang sulo
Isara ka bintana. Rugyan ka run. Ang hangin nagapanaug
Sa akun hagdan pasaka sa imo gawang. Ang panuktok
Nagapakitaay kang kagutom kang atun mga bibig kag dila.
Isara ka bisita ang uran kadya nga gabii
Kag wara it sulo sa imong kuwarto.
Ginlantaw ko ang kudal sa atun tunga kag ginmitlang
Ang imo ngaran sa ana kadya kalabug. Sa hangin,
Ginpadara ko ang isara ka tinaga: palangga. Bangud isara
Ikaw ka kalibutan nga nagbalik kanakun sa dumaan
Nga handumanan: paglukso sa suba, paglatay sa kahon,
Ang hapdi kang duga kang balunggay sa akun pilas,
Ang humot kang tag-arani kag nagabuskag nga rosas —
Kaimaw kita sa mga buhi sa palibot, kag ang uran nagapanunlog.
Palangga, ginalakbang ko ang kudal, nagapanuktok ako
Sa panunduman. Pero nagapatunga sa kamingaw
Kang hangin sa akun panit ang kamatuoran kang atun urihi
Nga haruk kag hakus. Nagsara ang gawang kag liwan ako
Nagturog nga nagaisahanon balon ang imo bug-at kag dapug.
Sa rum-an, matanum ako ka rosas. Wara it kamingaw
Sa uran. Rugya ikaw, buhay run: sangka hulot sa akun lawas.
