Nenen Geremia-Lachica/Bag-ong Bahit
Manunulat, bangon
pahidi ang imo mga luha
dali, bulig hakwat ka mga harigi
Kag timbangi ang liwan nga pagtibsok
Kang bag-o nga mga handum
Ang adlaw nagbutlak liwan
Agud atun pangitaun kag pangilalahun
ang kutub ka nabilin kang atun mga damgo
Indi mag-ugut, indi maghibi
Kon ang imo lapis kag papel wara run
Tandai lang kon ano ang imo nakita
Kag ginbatyag sa kadya nga mga inadlaw
Hay sa indi magbuhay ang imo mga tinaga
Mangin busay nga magailig
Manultol ka suba, mga bubon, mga sapa
Kag kabay pa makabulong sa urihi
Kang kauhaw nga sa dughan nagdapo.
Filed under: BLOG, NENEN GEREMIA-LACHICA Tagged: Antique, Bag-ong Bahit, Balay Sugidanun, Binalaybay, KINARAY-A, Ma. Milagros Geremia Lachica
